პარლამენტის წინ მიმდინარე აქციის მონაწილეების დარბევასა და დაკავებას უკანონოს უწოდებენ არასამთავრობო ორგანიზაციები; 1 მაისს საგანგებო პრესკონფერენციაზე მათ განაცხადეს, რომ 30 აპრილის ღამესა და 1 მაისს, გამთენიისას, რუსთაველის გამზირზე შსს-ს მიერ მშვიდობიანი აქციის დარბევა იყო "არალეგიტიმური და არაპროპორციული, რაც უტოლდებოდა წამებასა და არაადამიანურ, დამამცირებელ მოპყრობას. ადმინისტრაციული მუხლით დაკავების პრაქტიკა კი კვლავ თავისუფლების მომეტებული შეზღუდვის ინსტრუმენტად იქცა". „აქციის დარბევის შესახებ მიღებული გადაწყვეტილება იყო უკანონო ორი საფუძვლით: არ არსებობდა შესასვლელების ბლოკირების მიზნით დემონსტრანტების დარბევის საფუძველი. ასეთი საფუძვლის არსებობის შემთხვევაშიც კი არ არსებობდა მთლიანი აქციის დარბევის სამართლებრივი წინაპირობა, - განაცხადა "საქართველოს ახალგაზრდა იურისტთა ასოციაციის" თავმჯდომარემ ნონა ქურდოვანიძემ, - საპროტესტო აქციის დასაშლელად, როგორც საჯარო წყაროებიდან ირკვევა, გამოყენებული იყო ცრემლსადენი გაზი, რეზინის ტყვიები, წიწაკის სპრეი და წყლის ჭავლი. საპოლიციო ძალები ყოველგვარი ფაქტობრივი საფუძვლის გარეშე, პერიოდულად აკავებდნენ აქციის მონაწილეებს. დაკავებისას, პოლიციის კორდონში მოქცევამდე, მათ მიმართ ადგილი ჰქონდა ფიზიკურ ძალადობას“. არასამთავრობო ორგანიზაციები ყურადღებას ამახვილებენ პარლამენტის წევრის, ენმ-ის თავმჯდომარის, ლევან ხაბეიშვილის აქციიდან გატაცებისა და ცემის ფაქტზეც. არასამთავრობო ორგანიზაციების სამართლებრივი მხარდაჭერის ქსელი ცხელ ხაზზე იღებს ინფორმაციას დაკავებულებზე. ამ დროისთვის მათ უკვე აქვთ ინფორმაცია 50-ზე მეტი დაკავებული პირის შესახებ. NGO-ების ინფორმაციით, აქციის მონაწილეების ნაწილი გადაყვანილია სხვადასხვა ქალაქის იზოლატორებში: გორში, ხაშურში, დუშეთსა და მცხეთაში. მათი წარმომადგენლები ღამის განმავლობაში დადიოდნენ იზოლატორებში და აგროვებდნენ ინფორმაციას დაკავებულებზე. ისინი ისევ აგრძელებენ მათი ადგილსამყოფლის დადგენას. „მოვუწოდებთ ქართულ ოცნებას უარი თქვას რუსული კანონის მიღებაზე, ხოლო სპეციალურ საგამოძიებო სამსახურს მოვუწოდებთ, რომ მოახდინოს დროული რეაგირება მომხდარ დანაშაულებზე, გააკეთოს ამასთან დაკავშირებით საჯარო განცხადება და პერიოდულად საზოგადოებას აცნობოს გამოძიების მიმდინარეობის შედეგები. საქართველოს შინაგან საქმეთა სამინისტროს მოვუწოდებთ უარი თქვას კანონსაწინააღმდეგო, ადამიანის უფლებების დაცვასთან შეუსაბამო და ღირსების შემლახავ ძალადობრივ პრაქტიკაზე, ასევე სპეციალური დანიშნულების რაზმის თანამშრომლებს მოვუწოდებთ არ დაემორჩილონ უკანონო ბრძანებებს და არ გამოიყენონ ძალა მშვიდობიანი დემონსტრანტების წინააღმდეგ“, - აცხადებენ არასამთავრობო ორგანიზაციები. შს სამინისტროს ბოლო ინფორმაციით, „აგენტების კ...