„ნაციონალური მოძრაობის” წევრის, ეკა ხერხეულიძის განცხადებით, მიხეილ სააკაშვილი არ არის წინააღმდეგი, რომ სასამართლო პროცესი პალატაში ჩატარდეს, იმ შემთხვევაში, თუ ეს პროცესი კამერებისთვის დახურული არ იქნება. როგორც ეკა ხერხეულიძემ კლინიკა “ვივამედთან” განაცხადა, მიხეილ სააკაშვილს სასამართლოს გადადებაზე რეაქცია არ ჰქონია, რადგან მას საამისოდ ძალა არ ჰყოფნის. „სასამართლო პროცესთან დაკავშირებით, მიხეილ სააკაშვილის პოზიცია არის ერთადერთი – მას სურს, რომ პროცესს დაესწროს. ეს იმ ცნობილი გარემოების გამო, რომ ყველა იმ ადამიანმა, ვისაც ეჭვი ეპარება ჩვენ გამოტანილი ინფორმაციის სისწორეში, ფიქრობენ, რომ ვაზვიადებთ, ნახოს რა მდგომარეობაშია. კიდევ ერთხელ გეუბნებით, რომ მაქსიმალურად თავშეკავებულად აღვწერთ მის მდგომარეობას. პირიქით, ვზოგავთ და არ აღვწერთ იმ სიმძიმეს, რაც ჩვენ პალატაში გვხვდება. რა თქმა უნდა, ის დამოუკიდებლად ვერ გადაადგილდება, მაგრამ არსებობს დამხმარე შესაძლებლობები – საკაცე, ეტლი, რითაც ის სასამართლომდე მისვლას შეძლებს. თუ ეს ტექნიკურად ვერ მოხერხდება, პალატაში ჩატარდეს პროცესი. მას არანაირი წინააღმდეგობა არ აქვს, ოღონდ ეს კამერებისთვის დახურული პროცესი არ იყოს. მან ახლა გაიგო, რომ სასამართლო გადაიდო. სთხოვა ადვოკატს, რომ მოვიდეს და დეტალებზე გაესაუბროს. სასამართლოს გადადებაზე არანაირი რეაქცია არ ჰქონია. ამ ადამიანს არ ჰყოფნის ძალა იმისთვის, რომ ყველა წვრილმანზე რეაქცია ჰქონდეს”, – განაცხადა ეკა ხერხეულიძემ....